Taariikh

Sheikh Axmed Deedat oo Ku Geeriyoodey Durban( S.Africa) 87-jir

Axmed Deedat: July 1, 1918 - August 8,  2005

Daacigii caanka ahaa, dood-yahankana ahaa, Sheikh Ahmed Hoosen Deedat (Axmed Deedat) ayaa maanta oo Isniin ah Agoosto 8, 2005 geeriyoodey.
Sheikh Axmed Deedat oo ah asaasihii jamciyadda caalamiga ah ee faafisa diinta Islaamka ee lagu magcaabo "Islamic Propagation Center International (IPCI)" oo xarunteedu tahay magaalada Durban, dalka Koonfur Afrika, waxa uu si lacag la'aan dunida dacaladeeda ku gaarsiiyey laba million oo ah nuqulada buugaag iyo cajalada video oo ah dacwada Islaamka.
Wadanka uu ku noolaa ee Koonfur Afrka waxaa diinta Islaamka soo galay boqolaal qof oo ay ku jireen dad markii hore faafin jirey diimo kale.
Deedat waxa uu muxaadarooyin iyo dood furan ku qabtay dhammaan daafaha dunida asagoo si guul ah dood furan ula galay in badan oo ah rag faafiya diinta masiixiga.
Waxaa aad loo xusuustaa doodii caanka ahayd ee uu magaalada Durban sannadkii 1981 kula yeeshay baadariga magaciisu layiraahdo Josh McDowell, doodaas oo cinwaankeedu ahaa "Ciise hab saliib ah miyaa lagu diley “Was Christ Crucified?” taas oo baadarigii uu u qushuucay hadalka Deedat.

Axmed Deedat o o sannadkii 1986 la guddoonsiinayo billada caalamiga ah ee Boqor Faisal..

Waxaa lagu qiyaasay in Deedat uu qoray ugu yaaraan ugu yaraan 20 buug, kuwa ugu caansana waxaa kamid ah: "The Choice - Between Islam and Christianity; "Is the Bible God’s Word?"; "Al Qur’an the Miracle of Miracles" ; "What the Bible says about Muhammad (PBUH)?"; iyo "Crucifixion or Cruci-Fiction?".
Deedat waxa uu ku dhashay dalka Hindiya degmada Surat, July 1, 1918. Aabihiis oo ahaa Dhar-tole (Harqaanle) waxa uu Koonfur Afrika u haajirey wax yar ka dib dhalashadii Deedat. Sanadkii 1927 ayaa Axmed Deedat Koonfur Afrika ugu daba yimid aabihiis, halkas oo noqotay gurigiisa uu dacwada ka faafiyo.
Sannadkii 1986 waxaa Sh. Axmed Deedat laguddoon siiyeey billaca caalamiga ah ee Boqor Faisal oo loogu abaal mariyey sida uu ugu khidmeeyey diinta Islaamka
Sannadkii 1996 ayaa waxaa ku dhacay xanuun maskaxda ku dhaca oo jirka ka dhiga hawl-gab (stroke), waxaan ka lumay hadalkii. Muxaadaradii ugu dambaysay waxa uu isla sannadkii 1996 ku qabtay magaalada Sydney, Australia, wax yar ka hor intii uusan xanuunsan, wixii xilligaas ka dambeeyeys waxa uu ku ururay sariir.
Bishii October 2000 mar ay SomaliTalk.com telefoon kula xiriirtay guriga Sh. Axmed Deedaat, waxaa wiil uu sheikhu dhalay oo magaciisa la yiraahdo Yuusuf Ahmed naga codsaday in salaan ka timid shiikha aan u gudbino dhammaan Soomaalida, waxaa kale oo uu Soomaalida iyo Islaamka oo dhan ka codsaday in ay u sooduceeyaan Shiikha in Ilaah caafiyo. Maanta oo Isniin ah (Agoosto 8, 2005) mar aan telefoon markale kula xiriirnay Yusuf Axmed Deedat waxa uu naga codsaday in aan fariin gaarsiino umadda Soomaaliyeed oo ah in ay Allah uga baryaan in uu u naxariisto aabihiis Deedat.
Telefonka lagala xiriiri karo Yuusuf Axmed Deedat waa: guriga: 2732-533-1790 ama Gacanta: 2782-670-1652.
Websiteka xarunta dacwada ee uu asaasay Deedat waa: http://www.ahmed-deedat.co.za/

---

      Zainab Al-Ghazali oo Ku Geeriyootey 88-jir 

Zainab Al-Ghazali

Zainab Al-Ghazali oo si weyn loog ayaqaan dalka Masar ayaa Arbacadii taariikhdu ahayd Agoost 3, 2005 geeriyootey ayadoo da'deedu ahayd 88 jir.
Zainab Al-Ghazali waxay sannadkii 1917 ku dhalatay meesha loo yaqaan Al-Baxiira. Waxana ay ka soo jeeda qoyska Cumar Bin Khataab, Khaliifkii Labaad ee Muslimiinta iyo Xasan bin Cali ibn abii Daalib.
Zainab waxay diinta Islaamka ka baratay culmi aad looga yaqaan Jaamacada Al-Azhar sida Sheikh Ali Mahfouz iyo Mohammad El-Naggar.
Yaranteedii waxat Zainab ku biirtay ururka dumarka ee loo yaqaan "Egyptian Feminist Union", ururkaas oo sannadkii 1923  asaastay gabadha magaceedu yahay Huda Sharawi.
Laakiin Zainab ururkaas waa ka baxday waxayna sannadkii 1937 ayadoo markaas labaatan jir ah asaastay urur ay leeyihiin dumarka Muslimiinta ah oo lagu magcaabo "Muslim Women's Association", ururkaas oo loo dhisay si loo dardar gelinta dumarka ayadoo asaas looga dhigayo sida ay diintu qabto iyo ujeedada diinta.
Markii ay ururkeeda asaastay waxay isla markiiba laysan ka heshay wasaarada Awqaafta Masar si ay u dhisto 15 masjid iyo dersin kale oo ay ayadu gaar u maalgelisey.
Zainab Al-Ghazali waxay aad ugu doodi jirtey dhaqan gelinta Shareeca Islmaaka, arintaas oo ka hor keentay Madaxweynihii Masar, Jamaac Cabdi Naasir. Waxaana Zainab loo taxaabay Xabsiga, halkaas oo si xun loogu ciqaabay, sida aad hoos ku arki doontid waxaa la weriyey si kasta oo loo ciqaabay in aysan marna ka leexan aaminsanaateedii hirgelinta Shareecada Islaamka.

Sayyid Qutb: 9 October 1906 in Musha – 29 August 1966

Waxaa la weriyey in sannadkii 1962 ay si qarsoodi ah ula xiriirtay Sayyid Qutb ayadoo u fariimaha usii marisay laba gabdhood oo ay asaga walaalo ahaayeen, waxana la weriyey in ay sidaas ku heshay qayb kamid ah buug uu xabsiga ku qoraayey. Barashada quraanka iyo daalacashada buugaas Qutb ayey bilaabeen kooxo kooxo in ay si qarsoodi ah u dersaan, waxaana qorshohoosu ahaa in dadka reer Masar diinta la baro muddo 13 sano ah, taas oo looga qiyaas qaatay mudadii uu Nebi Muxamed Makka dadka ku wacdinayey. Kaddib in dadka afti laga qaado, haddii markaas boqolkiiba 75% ay aqbalaan in dalka shareecada Islaamka lagu dhaqo ay markaas ku dhawaaqaan sidaas. Haddiise taasi dhici weydo in 13 sano oo kale dadka diinta la baro, sidaas oo kalena cod looga qaado, haddii weli dadku aysan diinta in lagu dhaqo aan 75% raacsanayn in markale sidii loo soo bilaabo 13 sano oo hor leh ilaa laga gaaro waqti ay dadku aqbalaan in shareecada lagu dhaqo Masar.

Jamal Cabdi Naasir: January 15, 1918 – September 28, 1970 Anwar Sadat: December 25, 1918 – October 6, 1981

Sayyid Qutb waxaa la xiran sannadkii 1954, kaddib markii la isku deyey in la dilo madaxweyne Jamaal Cabdi Naasir. Waxaana Sayyid Qutb xabsiga laga soo daayey sannadkii 1964 arintaas xabsiga laga soo daayey oo uu qayb ka qaatay ra'iisul wasaarihii Ciraaq, Cabdul Salaam Caarif. Laakiin 8 bilood ka dib ayaa markale dawlada Masar xabsiga u taxaabtay Sayyid Qutb, xilligaas oo ahayd 1965. Waxana lagu xukumay dil Qutb iyo lix qof oo kale, waxana Sayyid Qutb daldalaad lagu diley 29 August 1966.
Dadkii la xirxiray sannadkii 1965 waxaa kamid ahaa Zainab Al-Ghazali. Xilligaas oo ay dawlada Masar si sir ah ku ogaatey ururada siyaasadeed ee ka jira Masar waxay ku dhaqaaqday burburintooda, waxaana la xir xiray dad aad u tiro badan, rag iyo dumar, markaa sayaa la baabi'iyey ururkii ay Zainab Al-Ghazali asaastay ayadiina xabsiga loo taxaabay. Waxaana Zainab maxkamad la soo taagey sannadkii 1966 waxaana lagu xukumay xabsi daa'im ay u dheer tahay in ay qabato shaqo culus. Waxaase la soo daayey sannadkii 1971. Waa kadib dhimashadii Jamaal Cabi Naasir oo dhintay 1970. Waxaa markaas madaxweyne noqday Anwar Sadaat, sidii ayeyna Zainab u sii wadey fikirkeedii ahaa in la helo dawlad Quraanka iyo sunadu ay xukun u tahay.
Sannadkii 1981 mar waraysi lagula yeeshay gurigeeda oo ku yaal Heliopolis, Masar, Zaynab al-Ghazali waxay tiri:
Islaamku wuxuu siiyey wax kasta rag iyo dumarba. Waxa uu Dumarka siiyey wax kasta-- Xoriyad, xuquuq dhaqaale, xuquuq siyaasadeed, xuquuq arimaha bulshada, xuquuq caam ah iyo mid gaar ah. Islaamku wuxuu dumarka siiyey xuquuq aan qof kale oo qoyska ah la siin. Xorayn waa ka hadli karaan dumarka bulshada masiixiga, bulshada yuhuuda, ama bulshada aan diinba haysan, laakiin bulshada Islaamka waa khadal aad u weyn oo meel ka dhac ah in laga hadlo xoraynta dumarka. Qofta Dumarka ah ee Muslimada ah waxaa waajib ku ah in ay Islaamka barato si ay u ogaato ama ugu baraarugto in Islaamku siiyey dhammaan xuquuqdeeda.
Waxaana lagu tilmaamay in hab fekerkii Zainab uu sidaas ahaa ayna rabtey in dumarka Muslimiinta la baro diintooda si ay ugu baraarugaan xuquuqda ay diinta Islaamku siisay , dhinacoodana ay u ogaadaan waajibaadka lagu leeyahay, taas oo ay rumaysnay in ay wado u tahay helitaanka dawlad Islaam ah oo lagu dhaqo Quraanka iyo sunada Rasuulka Muxamed (scw).
Sannadkii 1981 waxa uu Anwar Sadat bilaabay in uu qabqabato xabsigana u taxaabo dad tiradooda lagu qiyaasay 1600 oo qof, arintaas oo dunda badankeedu kaga soo hor jeesatey hab lagu tilmaamay gacantiisa adag iyo xoog ku muquuninta dadka mucaaradka ku ah, iyo dhaqaalihii dalka oo aad hoos ugu dhacay.
Bishii October 6deedii sannadkii 1981 ayaa la toogtey Anwar Sadat asagoo joogey goob dabaaldeg lagu soo bandhigayey. Waxaana madaxweyne nimada la wareegey madaxweynaha hadda, Xusni Mubaarak.
Zainab Al-Ghazali intii ay noolayd buug ay qortay ayey kaga hadashay nolosheedii, buugaas oo lagu magcaabo Ayyam min Hayati.

---

Dadka Reer Holland oo Raacsan in Shaqaalaha Laga Mamnuuco Dharka Islaamka...
Sida laga soo xigtey United Press International, cod bixin ay dhowaan qaaday hay'ad Dutch ah ayaa waxaa ay sheegtay in badanaa dadka reer Netherlands (Holland) ay raacsan yihiin in dawladu ay dumarka Muslimiinta ah ee shaqaalaha ah ka mamnuucdo in ay xirtaan xijaabka, khimaarka iyo dharka kale ee Muslimiinta.
Hay'addaas oo lagu magcaabo TNS Nipo waxa ay su'aalo weydiisey 433 qof oo qaan gaar ah, kuwaax oo 63% oo dadkaas u dhashay Netherlands ay taageersan yihiin mamnuucida in dadka ka shaqeeya goobaha madaniga laga mamnuuco xirashada dharka Muslimiinta, iyo in 80% ay raacsan yihiin in shaqaalaha dawlada guud ahaan aysan xiran dhar noocaas ah.
Dadkaas su'aalaha la weydiiyey ayaa 57% waxay yiraahdeen waa in dumarka macalimiinta ah aysan xiran khimaar, halka 77% ay yiraahdeen waa in dumarka booliska ah aysan xiran khimaar, iyo 81% oo yiri waa in qareenadu aysan xiran khimaar, Waxa laga hadlayaa waa dumarka Islaamka ah'e.
Waxaa codbixintu sheegtay in fikrada dadka reer Netherlands ay wax weyn iska bedeleen marka loo barbar dhigo sannadkii 2003.
September 2, 2004 ayey ahayd markii Sharcigii Jacques Chirac ee Dugsiyada Faransiiska Lagaga Mamnuucayey Khimaarka Gabdhaha Muslimiinta uu Ka Dhaqan Galay dalka France. Guji... Halkan.

Boqorada Denmark, Margrethe II

Boqorka Begium, Albert II

Horraantii sannadkan 2005 ayay ahayd markii Boqoradda ka talisa dalka Denmark ay ku dhawaaqday erayo aad u kul-kulul oo ku wajahan muslimiinta dalkeeda jooga. Margrethe II, boqoradda Denmark ayaa Islaamka ku tilmaantay in uu yahay wax dunida oo dhan khatar ku ah, isla markaana ay tahay in la hor istaago. “waa in aynu muujinno diidmadeenna Islaamka” ayay tidhi iyadoo iska dhagatiraysa layaabka dunida. Guji... Halkan..
Isla sannadkan 2005 horraantiisii ayey ahayd markii Boqorka Belgium uu Taageeray Agaasime Difaacay Gabar Xijaaban. Boqor Albert II ayaa bishii Janaayo 12keedii soo dhoweeyey nin agaasime shirkadeed ah iyo gabar xijaaban oo uu ninkaasi difaacey, waxana uu boqorku arintaas uga gol-leeyahy in uu ku muujiyo taageeradiisa uu u hayo ninkaas taageersan in gabadhaasi xirato Xijaab marka ay shaqayneyso. Guji.... halkan.

---

Dalka Ruushka oo ay Ku Nool Yihiin 23 Million oo Muslimin ah, si Joogto ahna tiradaasi ay u Kordheyso..
Sida ay werisey hay'adda wararka u faafisa Ruushka ee loo yaqaan Interfax, guddiga muslimiinta ruushka ee loo yaqaan "Council of Muftis of Russia" ayaa shaaca ka qaaday in dalka Ruushka ay hadda ku nool yihiin 23 million oo Muslimiin ah. Tirada guud ee dadka Ruushku waa 144 million.
Warbixintaas oo ay Khamiistii faafisay Interfax waxa ay intaas ku dartay in dadkaas Muslimiinta ah ee ku dhaqan Ruushka ay san ahany dad qaxootinimo ama laajinimo ku yimid ruushka, balse ay yihiin dad weligood inta taariikhdu xusuusato halkas deganaa.
Waxaa warku intaas ku daray in tirada muslimiinta  ee dalka Ruushku ay si joogto ah u koreyso dadkuna ay diinta Islaamka u soo gelayaan si aan kala go' lahayn.

---

London, UK: Amiirka u Caleemo Saaran Qatar oo Laga mamnuucay Meel Nightclub ah

Amiir: Tameem Bin Hamad Al-Thani

• "Saddex nin oo Reer Qatar ah oo uu ka mid yahay Amiirka 25-jirka ah ee u caleema saaran Qatar, Tameem Bin Hamad Al-Thani, oo Khamriaysan, kuna kacay ficilo anshax xumo ah ayaa laga mamnuucay Night Club-ka ugu weyn London. Club-ka waxaa lagu magcaabaa "Good As You" oo loo soo gaabiyo (G.A.Y ). "

Sida ay qortay shabakad laga leeyahay dalka Qatar, Islamonline.net, Amiirka u caleema saaran boqornimada dalka Qatar oo ah mid wax ku bartay dalka UK, oo xilligan xagaaga ah badankiisa joogey magaalada London, ayaa waxa uu ka qayb qaatay dagaal feer la is dhaafsaday (saddexda reer Qatar oo uu amiirku ka mid yahay) iyo dhallinyaro reer London ah.
"Amiir Tameem iyo saaxiibadiis dembi laguma soo oogin, laakiin, waxaa laga mamnuucay Club-ka muddo 30 maalmoo dah" sidaas waxaa yiri mas'uuliyiin, sida ay xustay shabakada reer Qatar. Mamnuucidaas oo ay amreen booliska London waxa muddo hal bil ah ka dhigeysaa in uu san amiirku Clubka tegi karin, waa sida ay shabakaasi qortaye. Waxaaana warku intaas ku daray in meeshii feerku ka dhacay lagu xiray nin 30 jir ah oo magaciisa la yiraahdo Heard Michael oo dagaalka ka qayb qaatay.
Shabakada Islamonline.net arintaas uu ku kacay Amiirku aad ayey u cambaraysay ayadoo cambaraynteeda sal uga dhigeysa culmo tixraacaya diinta:
Shabakada oo qoraalkeeda sii wada waxa ay tibaaxday sida Allah u mamnuucay quumu luudnimada, waxana ay soo xigatey xadiiska At-Tirmidi ee lamabarkiisu yahayi: 1376.
Waxa kale oo shabakadu soo xigatey sheekha deggan Qatar ee aadka loo yaqaan, Sheikh Yusuf Al-Qaradawi oo yiri: "Culmiada Islaamka sida, Maalik, Shaafici, Axmed, iyo Isxaaq waxa ay yiraahdeen qofkii dembiga noocaas ah ku kaca waa in lagu dilo dhagax, hasoo maro guur ama yuusan soo marine".
F.G: Amiirka u caleemo saaran Qatar: Waa nin ka dhashay reer Boqorka dalka Qatar, isla mar ahaantaasna leh dhaxalka boqortooyada, bedelina doona amiirka ama boqorka hadda.. ...
  

Soo diyaarintoo Suleiman Bashiir Omar
  djibstars@hotmail.com
  djibstars@gmail.com
  djibstars@yahoo.com